Կահույքի 5 Ոճ, Որոնք Երբեք Դուրս Չեն Գա Նորաձևությունից

Կահույքը հանդիսանում է ինտերիերի գլխավոր և անբաժանելի մասը։ Այն ինտերիերի գեղարվեստական կազմակերպման գործոններից է, դեկորատիվ-կիրառական արվեստի հատուկ ճյուղ, ներկայումս նաև՝ գեղարվեստական ձևաստեղծման ոլորտ։

Ժամանակակից պայմաններում մեծ կարևորություն է տրվում տան ներքին կահավորանքին, կահույքի ոճերին և ինտերիերի հարմարավետությանը։ Ժամանակի պահանջներին համապատասխան կահույքի ոճերը ենթարկվում են բազմաթիվ փոփոխությունների, սակայն կան որոշ ոճեր, որոնք պահպանում են իրենց արդիականությունն ու առանձնահատկությունը։ Ոճի յուրահատկությունը կայանում է կահույքի դետալների և աքսեսուարների մեջ, քանի որ հենց փոքր մանրունքն են ստեղծում տպավորիչ մթնոլորտ։

Ստորև ներկայացնում ենք այն 5 ոճերը, որոնք շարունակում են մնալ ակտուալ և նորաձև՝

1. Դասական

Դասական ոճը միաձուլում է կահույքի յուրաքանչյուր դետալի շքեղությունը, նրբագեղությունը և ինքնատիպությունը։ Բնական փայտը, մանրակրկիտ ձեռագործ աշխատանքը և բարձրորակ նյութերի համակցումը արտացոլում են կահույքի յուրօրինակությունն ու դարերի պատմությունը ։ Դասական ոճը աչքի է ընկնում տաք և բնական երանգներով, դետալների համաչափությամբ, ոսկեգույն դեկորներով, որոնք ավելի ցայտուն են դարձնում կահույքի և ինտերիերի ճոխությունը։ Այդ ոճը միշտ կպահպանի իր հմայքը՝ շնորհիվ իր հավերժական գեղեցկության։

2. Մոդերն

Մոդերնը ժամանակակից էսթետիկ ոճ է՝ հիմնված պարզության և ֆունկցիոնալության վրա։ Այն հիմնել է ճարտարապետ գերմանա- ամերիկացի Լյուդվիգ Միս Վան Դեռ Ռոհը։ Այս ոճում շեշտադրաված են մաքուր գծերը, բնական նյութերը և նուրբ գունային գամման։ Կահույքը չունի ավելորդ նախշեր, ինչը ինտերիերը դարձնում է ավելի հանգիստ և թեթև։ Այս ոճը կիրառելի է ինչպես գործնական միջավայրում, այնպես էլ տանը։ Որպեսզի ընդգծվի մոդերն ոճի յուրահատկությունը , հաճախ այն լրացվում է կահույքի աքսեսուարների միջոցով։ Մոդեռն ոճի նպատակն էր գեղագիտորեն իմաստավորել կառուցվածքային նոր համակարգերը, արվեստին հաղորդակցել կյանքի բոլոր ոլորտներին ու մարդուն դարձնել գեղարվեստական ամբողջության մասնիկ։

3. Նեոկլասիկ

Նեոկլասիկ ոճը համարվում է դասական շքեղության և ժամանակակից պարզության զուգակցումը։ Ոճին բնորոշ է ժամանակակից դասականությունը ու խստությունը։ Ոճի կիրառումը հնարավորություն է տալիս ապահովել հարմարավետ կյանք՝ ներկայացուցչական միջավայր ստեղծելու միջոցով։ Նեոկլասիկ ոճին բնորոշ է էլէգանտ գունապնակը իր պաստելային գույներով և ոսկեգույն շեշտադրումներով։ Այստեղ օգտագործվում են բարձրորակ նյութեր, ինչպիսիք են՝ մարմարը, փայտը , բրոնզը, որոնք նրբագեղ տեսք են հաղորդում միջավայրին։ Նեոկլասիկ ոճի ննջարանները, ճաշասենյակները, հյուրասենյակները, այդ թվում փափուկ կահույքը, առանձնանում են իրենց էլէգանտությամբ, մեղմ գույներով և թավշե երեսպատմամբ։

4. Սկանդինավյան

Սկանդինավյան ոճը սկիզբ է առնում հյուսիսային երկրներից։ Այս ոճի առանձնահատկությունը կայանում է իր հանգստության և հարմարավետության մեջ, որն ապահովում է միջավայրի մաքրությունը, պարզությունը և ֆունկցիոնալությունը։ Բնական լուսավորությամբ հարուստ այս ոճը շեշտը դնում է թե’ բնական եւ թե’ արհեստական լույսի վրա՝ լուսավոր եւ խնամված ինտերիեր ստեղծելու համար։ Ինտերում շեշտադրված են մինիմալիստական կահույքը և բնական նյութերը։ Փայտե հատակը, բաց երանգի պատերը և նուրբ տեքստիլով պատված փափուկ կահույքը կապահովեն հոգու ներդաշնակությունը։ Սկանդինավյան ինտերիերը չի կրում պարտադրողական բնույթ, հարկ եղած դեպքում հնարավոր է օգտագործել արձանիկներ և տարբեր դեկորային տարրեր։

5. Արտ–Դեկո

Արտ–Դեկոն ձևավորվել է 20-րդ դարում՝ միավորելով արվեստն ու դիզայնը։ Այն առանձնանում է իր հստակ, սիմետրիկ երկրաչափական տարրերով և գծերով, բաց գույներով եւ ինտերիերին արտասովոր տարրեր հաղորդող ձեռագրով։ Արտ-Դեկո ոճին հատուկ են շքեղ նյութերը՝ փայլեցված փայտը, մարմարը և ոսկին։ Ոճին յուրահատուկ տեսք են հաղորդում նաև բյուրեղյա և ապակյա դեկորները, շքեղ լամպերը, նկարազարդ և արևանման հայելիները։ Այս ոճում կարևոր դեր ունի նաև արտահայտիչ լուսավորությունը, որն ապահովում են լուսամփոփերով և շքեղ ջահերով, որոնք պատված են ածաթե, ոսկե կամ մուգ բրոնզե մակերեսով։ Արտ Դեկոն ոճ է, որը ինտերիերում միահյուսում է շքեղությունն ու ճարտարապետությունը՝ ընդգծելով գեղագիտությունն ու հավասարակշռությունը առանց ավելորդությունների։